На 29 март 2019 год. Центарот за развој на Пелагонискиот плански регион организираше промотивна конференција за проектот: Зголемување на можностите за развој на туризмот преку искористување на постоечките ресурси I-TOUR, кој е финансиран во рамките на Програмата за прекугранична соработка со Р. Грција 2014-2020.
Носител на проектот е Центарот за развој на Пелагонискиот плански регион, додека партнери во имплементацијата се: Национален Парк Пелистер, Факултет за туризам и угостителство – Охрид, Национален Парк Преспа (ГР) и Факултет за бизнис администрација – Солун (ГР).
Главната цел на проектот е подобрување на атрактивноста и промоција на прекуграничниот регион Пелагонија/Лерин/Солун и зголемување на вработеноста во туризмот.
Овој проект ги адресира заедничките предизвици од областа на туризмот во прекуграничниот регион, како што се; непостоењето на заеднички прекуграничен туристички производ, ниското ниво на одржливото искористување на природните ресурси-како и нискиот процент на луѓе во руралните средини од прекуграничниот регион кои што работат и заработуваат од туризмот.
За прв пат со овој проект ќе се работи преку мултифункционален пристап кон подобрување на туристичкиот сектор во прекуграничниот регион Пелагонија/Лерин/Солун вклучувајќи: градење на капацитети, вмрежување, развој на заеднички одржлив туристички прекуграничен производ, одржлив менаџмент на културното и природното богатство како и маркетинг и промоција на туристичките потенцијали на прекуграничниот регион.
На конференцијата присутни беа, релевантни чинители од областа на туризмот од јавниот, приватниот, невладиниот и академскиот сектор. Конференцијата беше свечено отворена од страна на Заменик министерот за локална самоуправа - Дејан Павлески а обраќања до присутните имаа и Градоначалничката на општина Битола а воедно и Претседателка на Советот за развој на Пелагонискиот плански регион – Наташа Петровска како и Раководителот на Центарот за развој на Пелагонискиот плански регион -Гого Видимче.
