Конституиран во 1956 година, Македонскиот театарскиот фестивал „Војдан Чернодрински“ континуирано е домаќин на најдобрите театарски/драмски остварувања од целокупната македонска театарска продукција работени според дела од светската драматургија а особено се афирмира македонското драмско творештво.
Оваа година МТФ се одржува од 5 – 10 Јуни, а беше отворен јубилејно, по 45-ти пат, со претставата „Тупаница полна со љубов“ и со доделувањето на наградите за животно дело на актерите Ратка Чоревска, Мите Грозданов и Чедо Христов. Фестивалот свечено беше отворен од страна на заменик-министерот за култура на Р. Македонија, Драган Недељковиќ, а пред публиката се обратија директорот на фестивалот, Петар Темелковски и градоначалникот на Прилеп, Марјан Ристески. На свеченото отворање му претходеше отворање на изложбата на академскиот вајар Жарко Башески во ликовната галерија и изложбата на слики од ликовната колонија Де Ниро од Битола.
Фестивалот има натпреварувачки карактер во Официјалната програма и е од посебен државен интерес и единствен од ваков вид финансиран од Министерството за култура на Р.Македонија и Локалната самоуправа и од донации и спонзорства.
